Falábemos siempre de baltiar muries, sebes y tolo que, por ún u otru motivu, nos trancare el pasu col envís de tomar un camín propiu.Pero les rexes dacuando garren un color abstractu ya intanxible, ello ye, muncho más peligrosu.
Magar que lo cotidiano se torna reinvindicación, el pesu cárgase col pasu los díes; lo inxusto tien un tastu que fiede a normalidá y pasamos a talantar la vaselina como un complementu más del día a día.
Nestes altures nes que falar ta de más, l'avance mídise a nivel de retrocesu y la revolución ye un cuadru roxinegru colgáu na parede, hai coses que siguen como fai trenta años y si m'apuren ensin envís de camudar.
Enllénasenos la bocona de falar de derechos, ayudes, progresu, valores y respetu. Pero mientres dellos zarren el puño cola otra mano tapennos la boca. Anguaño que'l xixgante ta dormíu, nun ye plan d'esconsoñalu y resucitar vieyes pantasmes d'eses que faen cimblar de llercia la poltrona.Préstenos o non, el caltenimientu de la llingua y el respetu a los derechos de los falantes pasa pola llegalización. Asimilación por parte l'Estáu de la realidá de la cai, que non paternalismu. L'unicu remediu que sana a ún que ta n'arba la muerte son les cures a curtiu plazu. Y a estes altures de la película yá nos piquen les vendes.
Sicasí, hailos que van a lo de so, que tou movimientu seya motivu de réditos políticos, que la fin seya'l mediu afayadizu pa nós medrar. Tamos acorralaos ente los que ñeguen lo de nueso y los que quieren apropiase d'ello. Y los enemigos, a pesar del discursu de moda, hai que buscalos dientro.
Dicin que yo t'invento
llingua por mi nomada,
como s'inventa la rosa,
rosa namái na pallabra.
Dicin que la voz perpura
de los vaqueiros d'alzada,
fíxose dafechu muda
cuando baxó de la braña.
La Danza - Dixebra
No hay comentarios:
Publicar un comentario