hestoria universal de paniceiros

El secretu de nun aburrir ta en contalo too. Por eso equí cuentase namás a medies, dexando una penumbre adréi, y avisando yá dende les primeres llinies que de la verdá de lo que foi, o intuí o suañé, la mitá de la mitá. Almirador de Zola y de Balzac, nunca aspiré a ser un realista. Si yo siempre tuvi problemes pa enfrentame cola vida ¿por qué diba yo a adoptar una posición estilística que nun cuadraba, nun cayendo n'impostures, col mio carácter? Confieso que cuando que cuando se m'esixó qu'echara a andar los mecanismos de la intelixencia práctica pa solucionar problemes siempre opunxi el suañu y l'ideal como midíes paliatives. Y asina me foi y me va.

Asina ye como entama "Hestoria Universal de Paniceiros" (Xuan Bello), y asina quiciaves tenía que tener alvertió a la xente dende l'entamu d'esta mentira que cuerre la mesma suerte que le fontes que bebiera.
Si dacuando daquién me tien entrugao per dalgún llibru amañosu pa lleer, esta foi de xuru una de les rempuestes que llevó. Cola peracertada descripción de "crónica emocional d'un mundiu que desapaez" presentasemos una riestra de cuentos curtios, relatos, poemes o una hestoria (universal) llarga, lo llarga que pue ser la vida d'un guah.e nun pueblu del centro-occidente astur, lo llargo que pue ser el cantar emocional per unes formes que mos deprendieron el contautu cola xente y cola natura.
Delles de veces presentasemos tres del güeyar d'un neñu o d'un adolescente, estremaes formes de deprender los enguedeyos de la vida, les derrotes tanto individuales como coleutives.
Una hestoria, unes hestories que van de lo llocal a lo universal, faciendo ver la xuntura que hai ente el nuesu yo y los yo que hai escondios nel ellos. Una forma d'entender la tierra y el mundiu, que comparte el que escribe dafechu, del puñu y lletra de daquién que sabe contalo tan bien como ye Xuan Bello.
Recomendáu pa tolos que yos presta siguir coles hestories que lleen darréu de pesllar el llibru.