EsEs mAnEs

Por qué siempre tengo que facer lo que toca? ¿Por qué tengo la sensación de ser esclava del reló y de les carreres si la vida nun se para a preguntame pa ónde voi con tanta priesa?

Pidiré un deséu: nun quiero tener horarios. Por una vez y ensin que sirva de precedente, nun quiero saber si ye de día o de nueche, si toca comer o dir pa la cama. Apetezme dormir cuando toque espertase o salir cuando nun haya naide pela cai.

Llevar la contraria al mundu nun se me da bien. Faigo lo qu’esperen que faiga y nun sé dicir nunca que non. Trato d’esconder lo que los demás nun conocen de mi tres un mazcaritu de seguranza personal. O quiciabes nun escuendo nada y amueso a toos lo que llevo dientro. Depende’l día. Y eso cansa.

Llegó’l momentu de plantase. Nun puedo más, nun doi más de min. Merezo un descansu, un suspiru, un paréntesis, que la espalda nun pue con too. Voi mirar pa lo que tengo al mio llau y pensar por qué ta ehí. Hai que cuidalo, mimalo y pensar nello cada día. Lo demás, puru adornu. Si faigo una esbilla ente tolo qu’arrodia la mio vida, quedaré vacia pa la xente pero feliz conmigo mesma. Nesi momentu miraré pa les mios manes y veré otres manes que me garren bien fuerte, con mieu a que les suelte. Y tres elles unos güeyos que me dicen que me quieren, que pase lo que pase tarán conmigo. Que soi yo y lo demás nun importa un res.

Quiero tirar p’alantre ensin pensar nel futuru. Caminar. Poner un pie delantre l’otru ensin preocupame pol espaciu qu’ocupará’l tercer pasu. Ye lo meyor, créeme. Ye lo que pasa por nun tener una bola cristal que vaya diciendo qué pasará. Lo que seya, será, por muncho que-y dea vueltes, faiga planes o eche cuentes.
Poro, prefiero dexar que’l futuru venga solu, que me sorprenda. Y si’l vientu del Norte echa un soplíu y les mios esperances desaníciense dafechu, miraré pa ti, que tarás ehí y responderé cola tormenta del mio aliendu que nun pasa nada, que yo soi más fuerte y daré otru pasu. Y si’l sable nun me dexa siguir y ponme torgues nel camín, quedaré parada, daré la vuelta... pero solo pa garrar impulsu.

En definitiva, si les coses se tuercen, sé que les tos manes apertarán les míes pa que nun caiga y si salen bien, soltaránme un poco pa qu’otros tengan la oportunidá de recibiles, sabiendo qu’en realidá yá tienen dueñu.
Entós sí, cuando llegue’l momentu, yá pensaré. Volveré a poner el reló n’hora, volveré a facer un horariu qu’enxamás cumpliré, a forrar l’axenda de los planes escaecíos y a marcar los teléfonos que, esos sí, nunca escaezo.

Agora non. Nun toca. Nun quiero ser esclava del reló, de les hores, del horariu nin del calendariu. Solo quiero ser esclava de ti. Ensin solombres de duldes nin povisa nos güeyos. Ensin adornos nin pallabres vacies. Solamente eses manes que m’ayuden a construyir el camín. Les tuyes.

Por cierto, ¿tienes hora? ¿Non? Nun importa. Solo yera pa saber que sigues ehí