muyer tenies que ser

Pa ti que yes muyer porque lo digo yo.
Si tuviere que describite: gayolera, buena moza… anque pa otros seyas murnia, fea, tresparente, o daqué peor: nun seyas.
Tresparente nun pues ser, nin pa ellos nin pa min, porque recibes los golpes de xente como una xabata, faciendo eses cola to cinturina a ver si yes quién a esquivalos. Esmoleceste por otres, que nun puen facelo, que les lleven ensin quexase pola medrana y el mieu a daquién que diz que les quier, que lo faen pol so bien.
Tu sabes que nun ye asina y cuando les ves venir, ensin da-y la espalda a quien mal te quier, tentes de lluchar espatuxando como un neñín acabante de nacer anque lleves la vieyera nes venes.
Porque vieya yes, nun pues negalo, porque, magar que remociques dafechu cada vez que dalguién te tien na boca, los años que lleves nel cuerpu nun te los quita naide y con munchu arguyu, por más que los haya enfotaos n'espardir el llevantu de que pasasti pel llaboratoriu, pel quirófanu. Glaya, glaya, niégalo, nun calles. Espéta-yos na cara qu'enxamás lo necesitasti, que siempre los hubo que miraron por ti, por cuidate y mimate hasta nos peores momentos. Porque los hubo, aquellos nos que pensabes que nun salíes, que yá yera'l final. Y por aquella xente, los que tuvieron y los que tán, atopámoste tan guapa y buena moza.
¿Que tienes varies cares? ¿Que yes mui variable? ¿Y quién nun cambia en contautu cola xente, quién nun escueye les pallabres, los xestos, les miraes acordies col que tien enfrente?. Pues tu nun yes menos y tamién cambies y nun yes a entender por qué lo que pa otros ye bayura, nel to casu tómenlo como diversidá con esi tastu negativu que te fai ferver el sangre cada vez qu'ataquen lo tuyo ensin motivu nin razón.
Hasta los que nun te quieren, tiénente con ellos. Usénte na intimidá del cuartu, na escuridá de la nueche faciéndote sintir como una lladrona a la lluz de la lluna que tien qu'esperar qu'esta salga p'apaecer. Y non, tu quies salir con ellos, asoleyate como les demás, amosar los tos encantos al mundu y demostrar quien yes.
Porque ties que ser muyer, selo yo. Tragues carros y carretes enantes de rendite a la galvana que da'l lluchar escontra muries d'incomprensión y refugu. Cola sorrisa na boca, ensin solta-yos pallabra, tentes que t'abracen y t'upen como faen con otres, foriates o hermanes, qu'algamaron el so tronu tiempu va y nun dexen averase a les que tienen tantu derechu pa tar nél como tu. Y nun son elles, qué va, ye la xente que les arrodia, les males influencies. Eses que faen a daquién camudar la opinión cuando otros van soltando mentires basaes na so ciencia, na qu'ellos inventen pa facer creyibles les sos pallabres. Pero cuando llegues al coral d'esa xente y te conocen, yes agradecida y melguera, afalagas los oyíos con cancios d'amor y esperanza. Esperanza nesa eternidá pola que nagües, por esa reconocencia que tanto te prestaría, algamando esa situación perfeuta, na que nun necesites permisu pa salir, nin glayar pa falar nin sofitu p'asitiate nel llugar que ye de to.