namas contigo

Un rayu de sol apaez pente les nubes. Nunca llovió que nun abocanara, diz el refrán popular. Y ye cierto. Entamen a zarrase los paragües que coloreaben les calles, la xente prefier que l'orbayu que queda como recuerdu la tormenta, llimpie d'ellos la murnia y la dulda… de si siguir andando. La lluz recupera'l so terrén. Va ganando la partida. Y con ello… yo recupero la cordura, recupero la conciencia de tar viva. Ximielgo la cabeza pa quitar de mio los pensamientos que me faen… querer algamar la lluna. ¡Qué buenu ye l'olvidu y qué malos los recuerdos que manquen nel alma!
Porque pa realizar los mios suaños, quiero tar despierta. Quiero algamar la lluna, pero si nun puedo, nun voi quedame quieta. Llucharé y llucharé hasta quemame les manes escalando hasta lo cimero de les mios posibilidaes. Y si esbario, llevántome otra vez y vuelvo a entamar. Y si namás me quedo contigo, ente los dos llegaremos mui alto, lo más alto que podamos, lo más alto que mos dexen. Y esi sedrá’l nuesu techu, la nuesa cume. La tierra que mos arrodie sedrá nuestra porque la queremos, sedrá nuestra porque la amamos. Y naide podrá dicir… que nun soi yo, que nun somos nosotros. ¿Quién sabe lo que pasará dempués?
Eso yá nun importa. Si namás me quedo contigo.