DARREU

Ente los actos convocaos el prosimu 18 de payares. Darréu, organización de mocedá d´izquierdes afita´l so compromisu cola oficialidá de la llingua d´Asturies sofitando les concentraciones convocaes pol nueu coleutivu “N´AST” ente les sés de IU y PSOE.
Darréu quier dexar nidiu la so posición de rechazu escontra l´actitú hipócrita d´IU que con responsabilidaes directes de gobiernu participa activamente na represión y ñegación de los drechos llingüísticos y llexítimos del Pueblu Asturianu. Llamentamos nun poder sumanos al manifestamientu convocáu pol Conceyu Abiertu pola Oficialidá (CAO) considerando qu´ente los sos convocantes s´atopen dellos responsables directos de la situación predemocrática d´esti país (como por exemplu IU).
Darréu defendió y defenderá la oficialidá de la llingua d´Asturies ansina como´l respetu y promoción de les sos variantes, entendiendo que refugamos cualesquier intentu de segregación llingüística del occidente asturianu, otra razón más pola que nos sumamos a les concentraciones de “N´AST”, y refugamos denominaciones ayenes a los intereses nacionales. Poro, Darréu, fae un llamáu a la xenté p´andechar cola iniciativa de N´ast. ¡Llingua nacional, llingua oficial!