la seronda

La seronda ye tiempu pensatible, pa estudios graves y suaños de quien mira cuando los otros durmen y suaña cuando ta despiertu. La seronda, depués del carrusel del branu, tien daqué d’esquina afayadiza y grata: si salen agora a ver mundu fuera del espaciu urbanu comprobarán que’l mundu cambia a poco y a poco los colores del campu unos colores que garren otra tiez, otra tonalidá que prenuncia un tiempu —esperemos qu’asina sía—prestosu xunto al fueu del iviernu. El casu ye que la seronda yá ta equí depués de les escorribandes braniegues. Ye’l meyor momentu, digo, pa dar una revolada per ende y comprobar los signos de la historia nel rostru del país.

Yo nun soi conservador, nin no político nin no más estrictamente vital. Amo’l mio país asturianu y preocúpame’l so pasáu, el so presente y el so futuru. Tamién me doi cuenta que yo, como cualquiera, toi ente dos mundos: una Asturies que desaparez y otra qu’habrá nacer mañana. Digo too esto porque últimamente, cada vez que salgo a ver Asturies, nun la veo. ¿Ú la aquel campu ricu, cultiváu, aquellos montes mestos que convocaben el misteriu? Aliaráse too, pero vaya cómo s’alía: el cambiu climáticu, la especulación, la migración de les árees rurales a les urbanes… Nun sé, nun sé si tendrá igual.

Salgo y veo que cada día medren les autopistes. Nun sé aónde lleven, nin qué empreses se beneficien del so comerciu. Sé que la xente piensa que cuánta más autopista meyor y sé que yá tenemos más autopistes qu’Irlanda. La última vez que tuvi en Bélxica, un amigu asturianu sorprendióse de lo vieyes que taben ellí les autopistes: claro, aclaró otru, en Bélxica nun hai fondos mineros. Sé que medren les autopistes y los xalés adosaos: acaben de dicime que la veiga de Ripolles, en Pravia, va desaparecer tapecida por esa nueva sebe infecta, el xalé adosáu, y que yá tienen nun sé cuantes viviendes vendíes a vascos y madrileños. Lo mesmo me dicen de Cadavéu, de Llanes y Ribeseya y ún, nesta seronda, pregúntase: ¿vender el país ye la única manera de tirar p’alantre?

Serálo. Yo nun sé aónde lleva esto: dígolo con perplexidá. Posiblemente nun lleve a nundes. Queda, sin embargo, un suañu: vengo d’un país y puedo dar noticia d’él. Tamién los paisaxes que nos enseñen pela recién estrenada TPA: too ta tan curiosino que parez que nun hai escombreres, nin xalés adodosaos nin pales excavadores abriendo en canal la tierra. Esa Asturies cosmética parezse a la que conocimos, ye verdá; pero nun duel tanto como aquella.

xuan bello